Yangiliklar
O‘zbekistonda milliy brendlarni jahon bozorlariga targ‘ib qilish bo‘yicha kompaniya tashkil etiladi
O‘zbekistonda milliy brendlarni qo‘llab-quvvatlashning yangi tizimi joriy etiladi. Maqsad – ularning sonini ko‘paytirish va eng istiqbolli brendlarni xalqaro darajaga olib chiqish. Shu maqsadda o‘zbek brendlarini targ‘ib qiluvchi ixtisoslashtirilgan kompaniya tashkil etiladi.
Bu haqda bugun Prezident ishtirokida o‘tkazilgan yig‘ilishda ma’lum qilindi. Kompaniyaning vazifalari quyidagilardan iborat bo‘ladi:
xorijiy mutaxassislarni – brend-menejerlar, dizaynerlar, marketologlar va PR-mutaxassislarni jalb qilish;
xalqaro sifat sertifikatlariga ega va yuqori eksport salohiyatiga ega bo‘lgan kamida 50 ta mahalliy mahsulotni tanlab olish;
tanlab olingan brendlarni xorijda targ‘ib qilish uchun ularga maxsus sifat belgisi berish va keng ko‘lamli reklama kampaniyasini yo‘lga qo‘yish.
Yangi yondashuv o‘zbek mahsulotlarining tanilganligini oshirishga va mamlakatning tashqi bozorlardagi mavqeini mustahkamlashga xizmat qilishi kutilmoqda.
Eslatib o‘tamiz, bugun Prezident O‘zbekistonda Mall of Uzbekistan loyihasini ham e’lon qildi. Bu yirik savdo markazlari bo‘lib, ularda faqat mahalliy kiyim-kechak, poyabzal va charm-buyumlar brendlari namoyish etiladi.
Manba
HAMKORLAR
