Yangiliklar
O‘zbekiston savdo markazi. Mamlakatda faqat milliy mahsulotlar bilan shug‘ullanuvchi savdo markazlari paydo bo‘ladi
O‘zbekistonda yangi formatdagi yirik savdo markazlari – Mall of Uzbekistan tashkil etiladi. Ularda faqat milliy kiyim-kechak, poyabzal va charm buyumlar brendlari namoyish etiladi. Bugungi yig‘ilishda ularning tashkil etilishi Prezident tomonidan e’lon qilindi.
Hozirda mamlakatda yengil sanoat va charm-poyabzal sanoatiga oid 4 mingdan ortiq korxona faoliyat yuritmoqda. Biroq xaridorlar barcha milliy mahsulotlarni bir joyda topa oladigan savdo maydonlari mavjud emas. Yangi markazlar ushbu muammoni hal etishga yordam beradi: tadbirkorlarga savdo joylari minimal ijara stavkalari bilan taklif etiladi.
Endilikda kam ta’minlangan oilalar vakillari kamida 15 foizni tashkil qiladigan to‘qimachilik va charm-poyabzal korxonalariga soliq imtiyozlari beriladi. Bunday korxonalar uchun foyda solig‘i stavkasi 2 foiz, ijtimoiy soliq esa 1 foizni tashkil etadi.
Imtiyozlar olish shartlari soddalashtirildi: ehtiyojmand fuqarolarni ishga olishning majburiy me’yori ikki barobarga kamaytirildi, shuningdek, nogironligi bo‘lgan xodimlar ham hisobga olinadi.
Eslatib o‘tamiz, O‘zbekistonda milliy brendlarni qo‘llab-quvvatlashning yangi tizimi joriy etiladi. Maqsad – ularning sonini ko‘paytirish va eng istiqbolli brendlarni xalqaro bozorlarga olib chiqish. Shu maqsadda maxsus kompaniya tashkil etiladi.
Manba
HAMKORLAR
